لايعة جبدي من خدمه فاست تلكو! بعمري ما مر علي خدمه اردى من جذي :@
للامانه و عشان ما اظلم احد انا صارلي 3 سنين اتعامل معاهم و ما عمره مر علي جذي, اصلا ما اذكر بيوم احتجت ادق على خدمة العملاء خلال سنتين, كل شي كان تمام اللهم مره شهر 6 هالسنه و طبعا انصدمت ان محد يرد لما يدقون و كلمتهم بتويتر و خلال جم يوم انحلت المشكله و اذكر دزيت ايميل شكوى و اعتذرو على اللي صار و كنت دايما انصح فيهم للكل بس من عقب اللي صااار بعد عمري ما انصح فيهم, ماتوقعتهم جذي, اصلا انا من يخلص هالاشتراك ماني مجدده عقب هالمعامله عفتهم
الحين صار لي تقريبا شهر من جددت الاشتراك و كل يووووم لازم يفصل النت كل يووووم! لازم كل اسبوع اقعد ع الاقل يومين او ثلاث بدون نت!
بتقولون لي دقي على خدمة العملاء؟ دقيت الف مره بس طبعا ما يشيلون لو تدقون الساعه 6 الفير لان حضرتهم حاطين هالرقم عشان اهما متى ما صار لهم خلق تكرموا و تفضلوا عليكم و دقوا يشوفون شالموضوع
يعني انا بفهم انتو شماله حاطين الرقم دامكم ما تشيلون؟ و بتويتر تذلون الواحد على ما تردون
بالله اللي ما عنده تويتر اكاونت شلون يوصل لكم اذا النت عنده فصل؟
ولا الناس ما عندهم شغل ما غير كل يوم رايحين لكم عشان والله خدمتكم تلوع الجبد؟ ترى احنا ورانا اشغال مو فاضين كل يوم رايحين لكم
والله ذلونا ما يسوى علينا جددنا الاشتراك جنه نطر منهم ما جنه دافعين لهم لا و اللي يحر ان اشتراكي القديم يخلص اول شهر 8 يعني اول الايام انا دافعتلهم مو مره لااا مرتين و هم ماكو نت ولا خدمه مثل الناس
و اكاونت تويتر بس فالحين يحقرون و ما عندهم غير we will take care of ur problem dear
بس فالحين تزعجونا باتصالات موظفين المبيعات متى ما صار عندكم عرض و حتى ما تعرفون تدقون بوقت مناسب, يدقون الف مره و لي قلنا بنجدد يو يركضون ما صار نص ساعه الا اهما عندنا
بس لما نبيكم اتيوون تشوفون شعلة النت ما يشتغل لازم ننطر 3 ايام لما تتكرمون حضرتكم و تطرشون احد
لا و العله يجذبون علينا يقولون خلال 24 ساعه يكون الموظف عندكم
اي 24 ساعه؟ نطرتوني 3 ايام بدون نت اشغالي كلها متأخره
جم مره الوالد يروح لهم الورشه ولا يروح مقرهم الرئيسي و لي الحين يرد النت يوم يومين و بعدين يرد يفصل, و مره محد رد علينا كالعاده لا بتويتر ولا التلفون قام الوالد دق على مال المبيعات اللي خلانا نجدد قاله حولني على خدمة العملاء جان يقوم شيسوي الموظف المحترم؟ يحطنا على الهولد و بعدين يصك التلفون بويه ابوي
كفو والله عفيه عليكم جذي تتعاملون معانا؟! بس اهم شي تقبضون الفلوس و بعدين بالطقاق اللي يطق الزبون! والله ما تستحون على ويهكم, ما تحترمون عملائكم و بس فالحين تقصون علينا و تجذبون
و لما اكلمهم يقولون لي خلال 24 ساعه ايي الفني يشوف شالسالفه! طبعا هالكلام مو صحيح و جذبه يقولونها للعميل بالويه
اي 24 ساعه؟ نطروني 3 ايام يالله شرف الفني
انتو اللي مو قد كلامكم و موعيدكم لا تتفلسفون علينا و تقولون 24 ساعه
طبعا النت رد يومين و رد فصل
نطرت يوم كامل كل شوي اقول شوي و يرد شوي و يرد ماكوو لا ردوه ولا هم يحزنون
بعدها يوم الخميس ابوي راح لهم و تهاوش معاهم و كالعاده ما طلع بنتيجه, كلمناهم بتويتر و دقو علي قالوا في شغله لازم من الوزاره و الوزاره مخلص دوامهم ما يداومون الا الاحد فلازم انطر لي الاحد عشان حضرتهم يشغلونه لي, و على كل الشغل اللي متأخر قلت ميخالف انطر
صار الاحد, صارت الساعه 2 و ماكو نت, اكلمهم بتويتر يقولون لي احنا ما وعدنا نرده الاحد
نعممممممم!
عيل اللي كلمته انا و قلت له الاحد يرد و قالي اي هذا شيطلع؟ وين يشتغل مو بفاست تلكو؟
انا لو ادري من الخميس ان مهم رادينه الاحد جان يومها اكنسل الاشتراك و اخذ فلوسي, شالله حادني اظل معلقه
طبعا بعدها كلمت موظفهم و مثل كل مره سوينا حركة شيلي الواير ركبي الواير, غيري الواير, غيري الفيشه و كل هذا بدون نتيجه
و بعدها اكتشفنا تنا فاصلين خطنا, رحنا السنترال قالوا مو منهم, من فاست تلكو
يعني انتو شكوووو بخط التلفون
لا عارفين تسوين شغلكم مثل الاوادم و هم متدخلين بشغل غيركم
و آخر شي و بعد اسبووووع ركضه من مكان لي مكان و ستين الف مره ندق عليهم اخيراااا انحلت المشكله ، ما بغو والله طلعو روحي
انا دافعه حق اشتراك سنتين ساعه ساعه و دقيقه دقيقه و اتوقع خدمه سنعه طول هالوقت، ال10 ايام اللي ما كان فيهم نت نهائي منو بيعوضني عليهم؟ فاست تلكو، لا طبعاً! انا الحين صار لي شهر من مشكله لي مشكله معاهم كل ما بكتب بوست اتعوذ من ابليس و اهون بس مصخت السالفه! عقب اللي صار هالاسبوع قلت بكتب بوست و اللي فيها فيها
و كلمة الحق تنقال لو ما الاخ مشعل من قسم الدعم الفني و الاخت هدى جان انا لي الحين معلقه لا نت ولا بطيخ. يزاهم الله خير اللي جابلو الموضوع اليوم و حلو المشكله
الزبده : احترامكم للعميل و اسلوبكم معاه ترى الف مره اهم من الخدمه
حلاته يفصلون النت علي بعد البوست :)
0 التعليقات:
إرسال تعليق