امس كان موعدنا مع افتح قلبك مع زين، جان تذكرون تلقينا دعوه بداية هالاسبوع من شركة زين للأتصالات
هني ، و راح يكون في حوار مفتوح مع الرئيس التنفيذ للشركه الساعه 9 مساءاً في مقر الشركة في شويخ
طلعنا مبجر عشان لا تحوشنا الزحمه و الحمد لله وصلنا مبجر، اول ما دشينا رحب فينا الاخ محمد المهيني و ضيفونا، شوي شوي بدو يوصلون البلوقرز و الشي الحلو و اللي وايد حبيته ان ما بدينا متأخر
المكان وايد مرتب و شرح، و الالوان عجييبه
هالبوستر عجيب ودي اشلعه و احطه بداري لول
طبعاً اول شي رحب فينا الاخ محمد المهيني و من بعده الاخ خالد العمر اللي عرفنا بالمدراء الموجودين، و بدو البلوقرز يوجهون اسئلتهم اللي تناوب بالاجابة عنها المدراء من الاقسام المختلفه سواء تسويق او غيره
الاخ خالد العمر، ما شاء الله عليه بشوش و روحه حلوه
القعده كانت وايد حلوه، الاخوان كانوا وايد ودودين و صدورهم رحبه لتلقي الاسئله و حتى النقد ، يعني كلش ما كانت القعده رسميه و الكل خذا راحته بالكلام ، و وضحوا لنا وايد اشياء احنا نجهلها و ما نعرفها
عمر العمر
انا بطرح كذا شغله قالوها عشان الكل يعرف و يستفيد
بالنسبه لموضوع نقل الخطوط بسن الشركات و الكلام اللي طلع ان زين رافضه الموضوع و اهيا اللي موقفته لانها خايفه ان تخسر من عملائها عدد كبير، ردهم كان وايد منطقي و اهوا ان اللي صاير انهم يبون العميل يقدر يحول خطه من شركة للأخرى حتى لو كان عليه مديونيات مو دافعها ، و يحول خطه و بعد 3 شهور اذا ما دفع بعدين ينقطع الخط، و هالشي مو بمصلحة الشركة ولا بمصلحة المساهمين و ممكن تضر بالمال العام، شغله ثانيه ان الموضوع يحتاج وجود شركة او هيئة تنظم العمليه و تأسيس هالشركه او الهيئة مسؤولية الحكومه و شركات الاتصالات مالها ايد بالموضوع
شغله ثانيه، انا بنفسي و اتوقع الغالبيه من عملاء زين دايما يسئلون عنها الا و هيا ليش نشوف عروض قوية و اسعار اقل في باقي شركات مجموعة زين ، مثل زين السعوديه، و الجواب كان ان عدد العملاء في السعوديه اضعاف اضعاف العملاء بالكويت، و بالتالي الاسعار تكون اقل
من النقاط المهمه اللي ذكروها، و حبيت انبهكم عليها، واحد من الاخوان سأل هل اذا انا برا الديره و وصلتني مكالمه و ما رديت عليها تحاسبوني عليها و تخصمون من الرصيد، الجواب كان ان اذا كانت مسد كول فما ينخصم منك شي ، بس اذا ضغطت زر close عشان تسده بويه اللي متصل راح ينحسب عليك من قبل الشركة اللي في الديرة اللي انت فيها و بالتالي تضطر زين ان تخصم من رصيدك، اما بالنسبه للمسجات اللي تتلقاها فما في عليها رسوم
الاخت رهف العنجري من بلوق المثلث سألت عن الرعايه و على اي اساس يختارون منو راح يحصل عليها، الجواب كان ان زين لها كل سنه خطه مختلفه من ناحية الرعايه ممكن هالسنه يركزون على الجانب الصحي اكثر من الرياضي مثلا و مع هذا تظل في رعايه للجانب الرياضي بس بشكل اقل، و السنه اللي بعدها الوضع يختلف، و ان كل الطلبات ينظر لها بعين الاعتبار، و عن تشجيع الرياضه قالوا انهمم ما يردون احد لكن بنفس الوقت يراعون الاشياء اللي تتوالم مع مجتمعنا و ما تضره، مثل الرياضات الخطره او غيرها فاهما ما يبون يشجعون الناس عليها
الحلوه لجين سألت هل راح ينزل ايفون 5 بالكويت بنفس وقت نزوله بامريكا، الرد كان ان هالشي مو بايدهم و ان شركة ابل اهي اللي تحدد وقت نزول الجهاز في الاسواق في كل منطقه
هم الاخت رهف العنجري سألت عن نظام النقاط اللي تطبق في زين السعوديه و ليش ما تطبق عندنا، و كان الرد ان فعلا ما عندهم نظام النقاط بس في دقائق و رسائل sms مجانيه يعطونها لعملائهم كلن على حسب استخدامه، و هم عندهم نظام الولاء Customer Loyalty ، و ان العميل اذا مرت عليه مده معينه معاهم فهم له قدر معين من الدقائق و الsms المجانيه
و بعد ما خلصنا من الاسئله، عرضوا علينا دعاية زين اليديده ،و احنا كنا اول ناس نشوفها ، وااااااااااايد حلوه و انا متاكده انها راح تحقق نجاح كبير ~Pp:
و آخر شي بينوا لنا شلون نقدر نطلع الفاتوره عن طريق موقعهم خطوة بخطوة، الصراحه شي حلو و دليل على الشفافية بالتعامل مع العميل
يا جماعه، اللي عنده اي استفسار عن شغله، يتصل على الكول سنتر 107 و ما راح يقصرون معاه
احنا مشكلتنا ان اذا صادفنا شي ما عجبنا، او شغله مضايقتنا ما نتحرك، اي احد عنده شي يضايقه يقدر يتصل بالكول سنتر و ما يشوف الا اللي يسره ان شاء الله
tra they showed us that they really care about their customers & they want to know what is it that you like & what is it that you don't, what are you're suggestions & so on
الحين انا كعميله لزين تقريبا مقتنعه ان اغلب المشاكل اللي قاعده تصير اما بسبب جهل المستهلك ببعض الامور، و راح تنصدمون شكثر في اشياء ما تعرفونها، احنا اليوم سمعنا اشياء اول مره نعرفها، و السبب الثاني ممكن يكون بسبب تهاوننا في توصيل المشكله للشركه
بالنهاية احب اشكر زين على تنظيم هاليمعه الحلوه، كانت وايد مفيده و وضحت امور وايد كنا نجهلها، و ان شاء الله تتكرر هالسمعه الطيبه
و شكر كبيــــــــــــــــر على الهديه الحلوه، ما قصرتوا رايتكم بيضه
و ما انسى اشكر اخوي النشيط محمد المهيني على جهوده في تنظيم هالتجمع، عساك على القوه، ما قصرت
