انا وعدت الفولورز بتويتر اني اكتب Review عن طبق Life With Cacao الخاص بشهر رمضان و هو سوفليه القشطه ، Ishta Soufflé من ايد فهد الفهد
و هذا الReview
اول ما وصلت البيت امس بالليل لقيت هالكرتون الكيوت المجكنم ينطرني و داخله Ishta Soufflé
تبون الصج انا ما كنت وايد متحمسه لان احب الككاو اكثر ، و ماحب الاشياء اللي لونها ابيض لول
بس قلت خل اجرب ، ما راح اخسر شي
و النتيجه Wow
فهد الفهد ما شاء الله عليه اول شي بدع بالتقديم، شكلها وايد يشهي و الفستق اللي مستخدمينه حق التزيين ، يابوها رايت
اول ما كليتها ما حسيت انها سوفليه، يعني مو السوفليه التقليدي، لأ، و عكس توقعاتي القشطه كانت خفيييفه، من فوق طبقة بسبوسه بعدين تحتها القشطه ترفه، مزيج حلو، و هم ميزه ثانيه عجبتني فيها انها ما كانت وايد حاليه
يعني باختصار، يت عكس توقعاتي لان اي شي فيه قشطه دايما اتوقع يكون شيره و ثقيل، اما هالسوفليه كانت شي ثاني، خفيفه و حلاتها متوسطه
انا بصراحه جازفت و كليتها ع السحور و الحمد لله لا قعدت على جبدي ولا شي
و تدرون تصلح حق شنو؟ حق اللي بيسوي غبقه ، والله شكلها وايد مرتب ، و يتكون احلى دزيرت لا و شكلها تحسون اكله رمضانيه ويا هالفستق
والله بتكون فكره حلوه حق الديزرت بغبقة، شكلها راقي بالتقديم
الصراحه قاعده ادور شي واحد ما عجبني بالطبق ماني لاقيه، يمكن الشي الوحيد اهوا ان ما فيها ككاو لووول *اتغشمر*
بالنهايه احب اشكر Life With Cacao اللي اتاحولي فرصه تجربه طبقهم اليديد، كلكم ذوق
اشكر فهد الفهد على هالطبق المميز، وايد مبتكر و قدر غير بالسوفليه التقليدي و اضاف لمسته الخاصه، تسلم ايدياتك ، و برافو Life With Cacao كالعاده اختيار موفق
و ان شاء الله بنزوركم مع الاهل عن قريب عشان يجربون السوفليه
